• Að gera leikhúsið aðgengilegt sem flestum – Þjóðleikhúsið fyrir alla!
• Að efla leiklistarlæsi og leiklistaráhuga almennings og þá einkum ungs fólks.
• Að veita kennurum sem vilja nota leiklist í skólastofunni stuðning, m.a. með námskeiðahaldi, vinnusmiðjum, útgáfu fræðsluefnis og persónulegri ráðgjöf.

Meðal verkefna fræðsludeildar í upphafi leikárs:

Kynning á Sitji Guðs englar fyrir heyrnarlausa

Í samstarfi við Félag heyrnarlausra býður fræðsludeildin upp á ókeypis  táknmálstúlkaða forkynningu og heimsókn baksviðs fyrir heyrnarlausa/heyrnarskerta leikhúsgesti á sýningunni Sitji Guðs englar eftir Guðrúnu Helgadóttur.

Skoppa og Skrítla – leiksýning fyrir 9 mánaða og eldri!

Í byrjun október verður þessi skemmtilega litla smábarnasýning frumsýnd á Leikhúsloftinu. Fræðsludeildin fylgir sýningunni eftir m.a. með leiklistarnámskeiðum fyrir leikskólakennara. Leikkonur sýningarinnar; Linda Ásgeirsdóttir og Hrefna Hallgrímsdóttir leiðbeina.

,,Stórfenglegt” námskeið á einfaldri íslensku

Fræðsludeildin býður nú í fyrsta sinn upp á námskeið fyrir fólk með takmarkaða íslenskukunnáttu. Hugmyndin að baki námskeiðinu er að veita þátttakendum örlitla innsýn í íslenskan leikhúsheim, og kynna ákveðið verk fyrir þeim. Þátttakendur fá að koma í heimsókn í leikhúsið baksviðs, hitta íslenskt leikhúslistafólk og fá útdrátt og útskýringar á söguþræði leiksýningarinnar Stórfengleg!  áður en þeir fara í leikhúsið. Námskeiðið er haldið í samstarfi við fræðsludeild Alþjóðahúss

Patrekur 1,5 – farandsýning í framhaldsskóla

Þjóðleikhúsið leggur land undir fót í haust, og fer í leikferð með þessa hressilegu farandsýningu í framhaldsskóla. Fræðsludeildin hefur umsjón með sýningunni, og fylgir henni eftir m.a. með útgáfu fræðslupakka sem verður lífsleikni-miðaður.

Reglulegt starf fræðsludeildar:

Vinnusmiðjur kennara

Mánaðarlegar vinnusmiðjur fyrir leiklistarkennara í allan vetur - í samstarfi við FLÍSS – Félag um leiklist í skólastarfi

Fræðslupakkar

Fræðslupakkar fylgja völdum sýningum í vetur. Þeir eru hugsaðir sem stuðningur fyrir kennara sem vilja undirbúa leikhúsferð og fylgja henni eftir í skólastofunni. Hver pakki inniheldur upplýsingar og ítarefni um sýninguna, ásamt spennandi kennsluhugmyndum. Fræðslupakkarnir verða allir aðgengilegir ókeypis á vefsvæði fræðsludeildar.

Skólaheimsóknir / starfskynningar

Þjóðleikhúsið hefur um árabil tekið á móti skólahópum í heimsóknir baksviðs. Síðastliðinn vetur fengu um 800 börn kynnisferð um leikhúsið. Þessar heimsóknir eru í umsjón fræðsludeildar, og verður þjónusta við skólahópa styrkt enn frekar í vetur.10. bekkingum býðst auk þess að koma í leikhúsið á sérstaka starfskynningardaga, þar sem þeim gefst m.a. tækifæri til þess að kynna sér starf hinna mismunandi deilda hússins, hitta leikhúslistafólk og taka þátt í leiksmiðju.