Krónan gengur

Æfing í að segja sögu sem hópur. Athugið að sennilega er betra að gera þessa æfingu standandi í hring, annars er hætta á að þátttakendur sofni á verðinum. Heilinn starfar betur á tveimur fótum. Látið krónuna ganga þvers og kruss yfir hringinn, en ekki í röð. Þannig þurfa allir að vera vakandi allan tímann. Ítrekið við þátttakendur að flækja ekki söguna um of. Takmarkið er að segja samhangandi sögu sem hópur, hratt og örugglega.

·          Hópurinn situr eða stendur í hring.

·          Stjórnandi heldur á krónupeningi (eða einhverjum öðrum hlut) og byrjar að segja sögu (eitthvað mjög einfalt), eina setningu eða meira.

·          Stjórnandi hættir í miðju kafi, jafnvel í miðri setningu, og lætur krónuna ganga til einhvers annars í hópnum, sem heldur áfram að segja söguna. Látið ganga koll af kolli. Sá sem er með krónuna verður að tala. Ekki hugsa, bara tala og láta krónuna ganga.