Á saumastofu Þjóðleikússins starfa fimm konur. Þær sauma eða kaupa alla búningana í öll leikritin á sviðunum þremur. Búningahönnuður hverrar leiksýningar teiknar búningana en starfsfólk saumastofunnar útfærir teikningarnar þannig að hægt sé að sníða þá og sauma.  Alla fylgihluti svo sem skó, veski, belti og hatta sér saumastofan líka um. Það er mikilvægt að starfsfólk saumastofunnar sé vel að sér í saum frá öllum tímum búningasögunnar og þekki vel eiginleika mismunandi efna.

Þegar búið er að frumsýna verk er ekki öll sagan sögð. Þá þarf að þvo og yfirfara þá búninga sem í notkun eru svo leikari standi ekki á sviðinu í miðri sýningu með allt niðrum sig kannski!

Stórt búningasafn er líka í umsjón saumastofunnar. Þar eru allir búningar leikhússins frá upphafi geymdir. Allt frá fisléttu híalíni upp í 20 kg ísbirni og allt þar á milli. Búningar eru leigðir út til starfandi leikfélaga um allt land.

Starfsfólk á saumastofunni er með menntun frá fataiðnaðardeild Iðnskólans eða aðra sambærilega menntun. Búningagerðin lærist svo með starfsreynslunni á saumastofunni.

Margrét Sigurðardóttir er forstöðumaður búningadeildar. Fræðsludeildinni lék forvitni á að vita hvaða búningur væri eftirminnilegastur af þeim sem hún hefði gert í Þjóðleikhúsinu.  "Við fórum að rifja þetta upp hér á saumastofunni og erum sammála um að ísbirnirnir þrír úr leikritinu Snædrottningunni hafi verið erfið en jafnframt mjög skemmtileg glíma. Við erum mjög stoltar af þeim."